Luk 2 | MCQ | STEP | Ijí vea kajino kamati Sisa Aukasitasira 'waravume ea ka'ene hura kwaa ara ka'ene 'ajohaujija iha ta'irono ea mapoka nianae va'avarono 'waramana.

Luke 2

Petirihemi Jesu Nahejajina

(Matiu 1:18-25)

1 Ijí vea kajino kamati Sisa Aukasitasira 'waravume ea ka'ene hura kwaa ara ka'ene 'ajohaujija iha ta'irono ea mapoka nianae va'avarono 'waramana. 2 Vea ka'ene Kwiriniasi Siria opuni 'ajohai'ina renani vajijino iha amura'e aneja vene tahara. 3 Ea mapoka puni aranejijino iha ve'irono va'ara. 4 'Ejume Josapi 'u'o Nasareti Karari vaji rene Jutia ara natohwa Petirihemi ka'ene Teviti oni araneji va'ana. Ijí hu va'ajihuni maijaho hu Teviti oni amuji jihuna'e va'ana. 5 Pu no'o Meri ka'ene hura 'wahuna'e nahama 'waravara ka'ene hari'i nenaji'i puni iha ve'irono va'ara. 6 'Ene pu ijí hijari vea kajino hura hariha nahehuni vea niroa apenana. 7 'Ejumakame hu ijí huni Hariha ka'ene amurijaho nahenana. 'Enareja hu apena ateha hwame 'ee hanupo 'iruma ijuri ruhi ranavume hinana. Ijihuni maijaho pura ruha ka'ene hihunijaho pa'ajihuna'e avajara.

Sipia 'Ajohi'ina 'Ee 'Ona Oji'inijihina

8 'Ejumakame ea ka'ene sipia 'ajohi'ina 'aho'a kwaa kajino vea kajihuni na'iijino puni sipia'e 'ajohi'i hijara. 9 'E'eme Natohwi jihuni 'ona oji'ini roe puni una'i nami'eme Natohwi jihuni hanaji'inijara pura namija kajaho hanana apene tauhuhana. 'Ejume pu niho'o natohwa'e tea junama paraniana. 10 Ona'oji'inijara ijá iama Juvujaho are'ika'i heha! Na joni vu'a maiu'ina mamaa'e apena routa. 'Ee ijara veje ja 'ee ea mapoka ka'ene kwaa araka mapoka kakino hijukija teamanama parahuna. 11 Ike iviasi na'iakino Teviti oni ara natohwijino joni Ni'ajihi'ina nahejara. Hu Keriso ka'ene Natohwijina. 12 Jara ijí hena kahunijaho ja vai'i kave pu atehi apene Hariha 'u'ua kajaho hwame hanupo 'iruma ijuri ruhi ranavu'e hinuna'omo ja ijí kahuna 'iamana. 13 Ijá ve'eme ni'aha kwino 'ona oji'ina kajaho 'ee 'ona oji'ina 'aho'a mapoka mapoka kahi akúpi 'ahi Godi ta'arohe javaa vejara. 14 Pu javaa ika'ina vejara

Godi ka'ene niho'o Ichuto Maiji huni pinana 'urinu. 'Ene ea ka'ene Godira iki mwe'i kime teamanamujihi matauvi'inijaho mihu 'wame ta'arohara.
15 Ona'oji'inijija akúpa 'ahi va'umakivi'i sipia 'ajohi'inijipo ijá 'wava Roe ma arira'e Petirihemi va'e ike unekaka reju'ukame Natohwijara roe nú 'warumuke kava 'wavara. 16 'Ejume pu marako vai'i kivume Meri ho Josapi ho Hariha 'u'ua kajaho ijano ijí hanuhapo 'iruma ijuri ruha kajino hijara. 17 Vea ka'ene sipia 'ajohi'ini jipuhipu Hariha 'u'ua kaji kavajaho raka ka'ene Hariha 'u'ua kaji rona 'waravajaho pu 'waravara. 18 Ea mapoka'e sipia 'ajohi'inijipo vu'a kaji 'waravume hejajaho niho'o oja hwa'usunahara. 19 'Enakaivo Merira ijí henarena huni oja vaji vwihananama apena va'ana. 20 Sipia 'ajohi'ina kajija 'unama vai'i uneka ka'ene pu kame hejaji Godi ta'arohe Huni pinana 'unama ahasirivara.

Jesu Temiporui Iha 'Iavajina

21 Na'ia iropu no'o pisu pa'arejume iji'a sisa 'uhu'avarono iha 'iame Jesuna 'wavara. Hu iji'a mai'o tei vaji muna'amarono ona'oji'inijara iha kajaho mahana.

Jesu Temiporui Godoni Ija Tahi Ranavajina

22 Vea kajara apejume Josapi'o Meri'o Mosisi oni tamani iraka ka'ene 'waramaji vene 'ee hariha ara hinajaho pa'are'eme pu Sesamaijaho isinara iramahe Jerusaremi Natohwiji ma'i 'ahiume va'ara. 23 Ikaho Natohwi jihuni tamana vaji ika'ina 'warumana. Hariha ka'ene amurijihi nahena'avajija Godi vajahuna 'úmana. 24 'Ene Natohwi jihuni tamana vaji 'warama ja'ina'e marahu'ora no'ohe'ina 'aho unea no'ohe'i 'eka va'e swasa vejura. 25 Heha! Ea pina huni ihijaho Simionina hu Jerusaremi vaji hinuna. Hu ea arira 'ee huni kaukara oja mahi'ina'omo hu Isureri opuni Mesaia 'ajaha hinuna. 'Ena'omo Godoni 'Avena hu samahana. 26 'Ejume Godoni 'Avenijara hu nahama 'waramajaho hu pakwa'ika'i hi'eje Natohwi jihuni Kerisora roa kahuna 'wavume hinana. 27 Hu 'Aveni vaji Temiporu roana. Vea ka'ene emahwapo Hariha Jesu aheme roajaho varapa tamana ve'i roara. 28 Simioni Hariha kajaho tapane apene huni ija 'ahi rana'ika'i Godi teimani 'wamana. 29 Hu ika'ina 'waramana Natohwe iviamaa Ara Oni ira vaji nahama 'warumajaho renu. 'Enakúne A Oni pwea veje matauma va'ama. 30 Ara Oni Ni'ajúhi'ina ka'ene ea mapokakihi puni una'i amairiaramajaho na nuni niakino kavu. 32 Hu ira ka'ene Jenitaru hananie najahunijina 'ee Hu Oni ehija Isureri opuni Hanani'inijina 'wamana. 33 Emahwapo vu'a ka'ene Hua rone 'waravaji hejajaho oja hwa'usahara. 34 Simionira pu merajihe 'ee Meri Huni ohijaho ijá 'wama Hena! Ike Harihakaho Isureri opuna pijahana. Hu Isureri ora 'aho'a veje arihe 'aho'a ajihuna. 'Ene Hu aacha'omo ea mapoka ijí kame Hu ninahuna. 35 'Eje ja temuka'amajaho areri so'wa 'usa rukina joni oja 'ahi naminau ja'ina'e rehuna. Ijihuni maijaho oja vaji hema vwiha roe samaumaa rehuna 'wamana. 36 Napara poropeti Ana Panueri oni 'apaja 'ee Asa oni amuja. Hu paranamaa paruahe'i hinajaho juara iropu no'o pa'arenana. 37 'E'eme hu amuna hinajaho juara mapoka mapoka (84) pa'arenana. Hu niho'o Temiporu paranamuna 'ee veiri'a na'ia rira 'aura areme 'ee siporua 'onuna. 38 Nijihijakura hu roe Godi teimani 'wamana 'ee ea ka'ene Jerusaremi puni Ni'ajihi'ina 'ajoha hijajihi majaa Hu rone 'waramana.

'Unama Nasareti Roajina

39 'Ejume pu Natohwi jihuni tamanijara 'waramajaho ve paranareja vukú'o 'unama Karari puni ara natohwa Nasareti va'ara. 40 'E'eme Sesamaa kajaho haruriji'i emarena ajime 'ee Huni vwiha 'u'o emarene 'ee Godoni maiji vwihanii'inijaho Hu hu'úmo majama namana.

Jesu Paruisea'e Jerusaremi Temiporu Vaji Hinajina

41 Juara kwinu kwino pa'are'eju'e emahwaha Jerusaremi Pasova sora i'i va'ura. 42 Vea ka'ene Hu juara iropu ropu no'o renajino pu kú'o tamanijara ve'avarono 'waramu ja'ina'e sora i'iro kahi va'ara. 43 Pura na'ia icharu hihuni veijaho nipa'arejume pu kú'o 'unama ari puni va'eme Jesuho Jerusaremi hinana kaivo Huni emahwahijija ijaho pahena pakavara. 44 Pu vwihajajaho Hu ea mapoka kajihipuni vaji va'u ronareja pu 'urina kwaa jora'e na'ia kwino va'areja ijí pakamareja aneja vene puni napuhija 'ee vwea vwina puni vaja kajino savara. 45 Pu Hu pakamareja kú'o 'unama Jerusaremi sama va'ara. 46 Vea no'opisu pa'are'eme pu Hu Temiporu vaji najahi'inijipo najahaji hene 'ee aporavi'i hi'eme piunavara. 47 Ea mapoka Hura eha mavarasa'ina ka'ene 'waramaji hejajaho pu niho'o oja hwa'usunahara. 48 Pu ijí kame hejajaho pu 'u'o oja hwa'usunahara. 'Ee oahi ijá 'wama Hariha nuna A iraka vene 'unama ika'ina 'ahúane? Nú omune'i niho'o oja hianu'eme Aa'e sarame apenojara 'wamana. 49 Hu pu ijá 'iama 'Ú ja raka vena Na sarivo? 'Ú Na Oma Nunijihuni sei hihunijaho ja pahejo? 'iamana. 50 'Enakaivo Hura raka ka'ene 'warama jihuni maijaho pu pahejara. 51 'Ejume Jesuho pu pu'úmo 'uname Nasareti va'ana. 'Enarena Hu emahwapuni ira hene venana. Oahi raka ka'ene hena kamajaho oja vaji vwihaji'i hinonana. 52 'Ejume Jesuho 'urine emakina rene 'ee vwiha vaji emarene 'ee Godiho 'ee emaa Hu ura rejura.